Ég er óseðjandi áhugamaður um gögn, tölvur, tækni og nýsköpun. Ég byrjaði að forrita átta ára gamall og seldi fyrsta hugbúnaðarleyfið þegar ég var fjórtán. Á síðustu þrem áratugum hef ég stofnað fimm hugbúnaðarfyrirtæki, nú síðast GRID þar sem ég starfa sem framkvæmdastjóri.
Tímalínan
GRID
GRID starfar á mótum gervigreindar og töflureikna. Töflureiknatækni okkar er í notkun hjá nokkrum af fremstu gervigreindarfyrirtækjum á þessu sviði.
Qlik
Starfaði sem framkvæmdastjóri vöruþróunar hjá viðskiptagreindarfyrirtækinu Qlik í Boston eftir kaup þeirra á DataMarket.
DataMarket
Stofnaði DataMarket með það að markmiði að gera talnagögn heimsins skiljanlegari og aðgengilegari. Flutti til Boston til að byggja upp sölu- og markaðsstarf okkar 2012. DataMarket var keypt af Qlik árið 2014.
Já / Síminn
Starfaði sem tæknistjóri Já og við viðskiptaþróun hjá Símanum eftir kaup Já-Upplýsingaveitna á Spurl. Leitartækni Spurl var grunnur að leitinni á Já.is.
Spurl
Smíðaði Spurl, eina fyrstu miðlægu bókamerkjaþjónustuna (social bookmarking). Spurl dró að sér yfir 200þús notendur á örfáum mánuðum, og leiddi af sér þróun á öflugri leitartækni.
Maskina
Stofnaði Maskina sem cann að farsímalausnum í árdaga nettengdra síma. Fyrirtækið sameinaðist norsku farsímafyrirtæki - Viva Nordic - og Maskina varð í kjölfarið að Vyke.
Gagarín
Vann við margvíslega vef- og margmiðlunarforritun eftir sameiningu Lon&Don og Gagarín undir merkjum þess síðarnefnda.
Lon&Don
Stofnaði Lon&Don, ásamt þremur félögum úr menntaskóla. Við bjuggum meðal annars til geysivinsæla íslenska orða- og krossgátuleiki. Lon&Don sameinaðist margmiðlunarfyrirtækinu Gagarín árið 1999.
Annað
Ég skrifa reglulega um tölvur og tækni á ýmsum vettvangi. Mikið af þeim skrifum má finna hér á vefnum. Hef verið reglulegur gestur í íslenskum fjölmiðlum, sérstaklega um málefni tækni og nýsköpunar og sit í stjórnum Miðeindar, Aranja, Isnic, Tækniþróunarsjóðs og í háskólaráði Háskólans í Reykjavík.
Myndir og lýsingar
Smelltu á mynd til að sækja í fullri upplausn.
Einlínu kynning
Hjálmar er miðaldra kall í nýsköpun. Hann hefur stofnað fimm hugbúnaðarfyrirtæki, nú síðast GRID. Hjálmar er óseðjandi áhugamaður um tölvur, tækni, fjölmiðla, lífið og tilveruna.
Stutt
Hjálmar Gíslason er stofnandi og framkvæmdastjóri GRID. Hann starfaði áður sem framkvæmdastjóri vörustjórnunar hjá Qlik, eftir kaup Qlik á fyrirtækinu DataMarket sem hann stofnaði 2008. Hjálmar er gagnanörd og frumkvöðull af lífi og sál, en GRID er fimmta hugbúnaðarfyrirtækið sem hann stofnar.